Verkefnið um þróun virðismatskerfis í þágu launajafnréttis er unnið á vettvangi faglegrar stjórnar í samræmi við samning fjármála- og efnahagsráðuneytisins og Jafnlaunastofu þar að lútandi og getur verið innlegg í mögulegar breytingar á kjarasamningum sem fjármála- og efnahagsráðherra gerir f.h. ríkissjóðs. 

Fagleg stjórn vinnur að gerð, prófun og mótun verklags um notkun virðismatskerfisins með stuðningi frá Jafnlaunastofu. Unnin verða starfasnið fyrir valda starfahópa til að fanga inntak starfa og til þróunar og prófunar á kerfinu. Tryggja verður að störfin sem verða til grundvallar starfasniðana, og þróunar kerfisins, séu fjölbreytt og þvert á málaflokka ríkisins þar sem sérstök áhersla er lögð á að draga fram og meta þá þætti sem einkenna störf þar sem konur eru í meirihluta. 

Verkefninu er skipt upp í fjóra meginhluta:  

1. Undirbúningur 
2. Gagnaöflun, starfagreiningar og starfasnið 
3. Þróun kerfis 
4. Prófun starfasniða 

Afurð verkefnisins er fullbúið virðismatskerfi með skilgreiningum á þáttum og þrepum með hjálpartexta, ásamt spurningalista til að styðja við mat starfa. Virðismatskerfið á að tryggja að starfsfólk sem gegnir jafn verðmætum störfum njóti jafnra launa og kjara, óháð kyni eða öðrum ómálefnalegum breytum sbr. lög nr. 86/2018 um jafna meðferð á vinnumarkaði og lög nr. 150/2020 um jafna stöðu og jafnan rétt kynjanna.

Í allri vinnu er tekið mið af markmiðum um launajafnrétti, gæði opinberrar þjónustu og stefnumiðaðrar mannauðsstjórnunar í samræmi við lög, kjarasamninga og alþjóðlegar skuldbindingar. Verkefnið er samstarfsverkefni þar sem stjórnarfólk hefur jafnt vægi og ákvarðanir eru teknar með einhug. 

Þann 1. desember 2020 skipaði forsætisráðherra starfshóp um endurmat á virði kvennastarfa. Starfshópnum var falið að leggja fram tillögur að aðgerðum til að útrýma launamun sem stafar af kynskiptum vinnumarkaði. Hópurinn skilaði tillögum sínum til forsætisráðherra í september 2021 og lagði til að settur yrði á laggirnar aðgerðahópur stjórnvalda um launajafnrétti með þátttöku aðila vinnumarkaðarins. Hlutverk hópsins yrði að greina vanmetna þætti í störfum sem konur gegna frekar en karlar og þróa verkfæri sem veitti atvinnurekendum stuðning við að tryggja jöfn laun fyrir jafnverðmæt störf óháð kyni.  

Í kjölfarið skipaði forsætisráðherra aðgerðahóp stjórnvalda og aðila vinnumarkaðarins um launajafnrétti og jafnrétti á vinnumarkaði. Eitt af verkefnum aðgerðahópsins var að setja af stað þróunarverkefni með þátttöku fjögurra ríkisstofnana sem þóttu endurspegla ólíka og fjölbreytta vinnustaði ríkisins. Leitað var til Jafnlaunastofu um að veita fræðslu um virðismat starfa og að þróa virðismatskerfi í samvinnu við aðgerðahópinn sem væri til þess fallið að stuðla að launajafnrétti. 

Til að greiða fyrir gerð kjarasamninga 2024 undirrituðu forsætisráðherra og fjármála- og efnahagsráðherra yfirlýsingar um aðgerðir gegn launamun kynjanna. Í kjölfarið skipaði forsætisráðherra stýrihóp um virðismat starfa í þágu launajafnréttis með þátttöku aðila vinnumarkaðarins. Verkefni hópsins er gerð heildstæð virðismatskerfis sem hafi launajafnrétti að leiðarljósi og taki mið af lögum, kjarasamningum og alþjóðlegum skuldbindingum. Í byrjun árs 2025 gerði fjármála- og efnahagsráðuneyti samning við Jafnlaunastofu um þróun slíks kerfis í samvinnu við hagaðila. Vorið 2025 óskaði Jafnlaunastofa eftir tilnefningum í faglega stjórn um þróun virðismatskerfis um störf hjá ríkinu frá ASÍ, BHM, BSRB, KÍ og fjármála- og efnahagsráðuneytinu.